Viðskiptahraðallinn Startup Reykjavík hefur hlotið viðurkenningu Nordic Startup Awards sem besti viðskiptahraðall Norðurlanda. Í dómnefnd voru um tuttugu einstaklingar úr röðum frumkvöðla, fjárfesta, stjórnenda og annarra sérfræðinga.
Í dómnefndinni situr fyrir hönd Íslands Hörður Arnarson, forstjóri Landsvirkjunar. Startup Reykjavík fór fyrst fram árið 2012 og verður haldið í fjórða sinn í sumar.
Arion banki og Klak Innovit standa að Startup Reykjavík en Arion banki hefur fjárfest í 30 sprotafyrirtækjum í gegnum verkefnið á síðustu 3 árum og leggur viðskiptahraðlinum jafnframt til fjármagn og aðstöðu. Fyrirtækin fá 2 milljónir í hlutafé frá Arion banka gegn 6% hlutdeild. Klak Innovit sér um framkvæmd verkefnisins.