Landsvirkjun hefur endurmetið horfur í vatnsbúskap fyrirtækisins að því er segir í fréttatilkynningu. Fram kemur að staðan í miðlunum í lok vetrar hafi verið góð og mikill snjór á Þjórsársvæðinu. Óvenjulega kalt og þurrt vor hafi einkennt þróun í vatnsbúskapnum að undanförnu. Kuldinn í vor hafi valdið því að vorleysing af hálendinu hafi hafist seint og verið hæg framan af. Um sé að ræða eina verstu vorkomu í rekstrarsögu miðlana Landsvirkjunar.
„Framundan er tími leysinga af jöklum og fer eftir magni jökulbráðnunar hversu vel gengur að fylla miðlunarlónin síðar í sumar. Ákoma á jökla var umfram meðallag síðasta vetur og enn er mikill snjór á hálendinu sem gæti haft áhrif til hins betra. Vegna þessara seinkaðra vorleysinga er ólíklegt að öll lón Landsvirkjunar fyllist í sumar. Hálslón sker sig úr og miklar líkur á að það fyllist þrátt fyrir lága stöðu nú. Um fjórðungslíkur eru á að Blöndulón fyllist samkvæmt endurmetnum horfum. Líkur á að lón Þjórsársvæðis fyllist eru litlar.“
Mögulegt sé að Landsvirkjun þurfi að draga úr framboði á raforku á skammtímamarkaði verði staða í lónum undir væntingum í haust. „Þó svo að öll lón fyllist ekki þá getur miðlunarstaða eftir sem áður verið ásættanleg. Hvenær lónin fyllast og fara á yfirfall mun meðal annars ráðast af veðurfari og jökulbráðnun næstu vikna og mánaða og ekki hægt að fullyrða neitt um tímasetningar sem stendur.“