Viðskipti | AFP | 6.7.2015 | 7:04 | Uppfært 10:15

Grísk áhrif á mörkuðum

AFP

Helstu hlutabréfavísitölur í Asíu og Eyjaálfu lækkuðu í dag í kjölfar þess að Grikkir höfnuðu þeim kjörum sem þeim stóðu til boða af hálfu lánardrottna í gær.

Eftir að fjármálaráðherra Grikklands, Yannis Varoufakis, sagði af sér í morgun rétti evran hins vegar heldur úr kútnum á nýjan leik.

Kínversk hlutabréf hækkuðu gríðarlega, eða um tæp 8%, á einungis nokkrum mínútum eftir að markaðir voru opnaðir í morgun en sú hækkun tengdist boðuðum aðgerðum kínverskra stjórnvalda til þess að styrkja hlutabréfamarkaði á meginlandinu. Hlutabréfavísitölur þar í landi lækkuðu síðan aftur og urðu litlar breytingar á milli daga þar.

Í Tókýó lækkaði Nikkei-hlutabréfavísitalan um 2,08% eða 427,67 stig og er 20.112,12 stig. Í Seúl lækkaði vísitalan um 2,40% og í Sydney nam lækkunin 1,11%.

Hlutabréfavísitalan í Taipei lækkaði um 1,09% og í Wellington nam lækkunin 1,10%.

Í Sjanghaí hækkaði vísitalan um 7,82% fljótlega eftir að viðskipti hófust í morgun og undir lok markaða var hækkun dagsins nánast búin að þurrkast út og var vísitalan 0,80% hærri en við upphaf viðskipta. Í Hong Kong hefur vísitalan lækkað um 4,12% það sem af er degi.

Evran hækkaði í 1,1088 Bandaríkjadali úr 1,1027 dölum eftir að Varoufakis tilkynnti afsögn sína en í New York í nótt hafði evran lækkað í 1,0963 Bandaríkjadali í nótt.

Á olíumarkaði hefur West Texas Intermediate-hráolía til afhendingar í ágúst lækkað um 2,10 Bandaríkjadali í 54,83 dali tunnan og í Evrópu hefur Brent-Norðursjávarolía lækkað um 75 sent og er nú 59,57 Bandaríkjadalir tunnan.