Breski Barclays bankinn tilkynnti óvænt um að bankastjóri bankans, Antony Jenkins, væri að hætta en hann var rekinn frá störfum.
Í tilkynningu kemur fram að þegar sé hafin leit að eftirmanni hans en Jenkins tók við sem bankastjóri samstæðunnar í ágúst 2012.
Varaformaður stjórnar bankans, Sir Michael Rake, segir að nú sé krafist annarrar færni en áður við stjórnun bankans.
Fjármálayfirvöld í Bandaríkjunum og Bretlandi sektuðu í maí sex alþjóðlega stórbanka um næstum sex milljarða Bandaríkjadala fyrir að hafa hagrætt með ólöglegum hætti vöxtum á gjaldeyrismarkaði sem og hinum svokölluðu Libor-millibankavöxtum.
Bankarnir Barclays, JP Morgan Chase, Citicorp og Royal Bank of Scotland gengust við brotum um að hafa svindlað á gjaldeyrismarkaði og svissneski bankinn UBS um að hafa hagrætt Libor-millibankavöxtum.
Yfirvöld segja að ákveðnir starfsmenn bankanna hafi rætt sín á milli á spjallrásum á internetinu um það hvernig stýra ætti vöxtum á markaði.
„Þeir hegðuðu sér sem félagar, frekar en keppinautar, í viðleitni sinni við að stýra vöxtunum í átt sem reyndist hagstæð bönkunum en skaðleg mörgum öðrum,“ segir Loretta Lynch, dómsmálaráðherra Bandaríkjanna. Samráð þeirra hafi haft slæm áhrif á fjárfesta og markaðinn í heild.
Breska bankanum Barclays var gert að greiða hæstu sektina, 2,4 milljarða Bandaríkjadala.