Kalli í Pelsinum selur á Selfossi

Stór hluti fasteignarinnar Austurvegur 1-5 á Selfossi, eða Kjarnans svokallaða, sem meðal annars hýsir verslun Krónunnar, hefur verið seldur. 

Seljandi er félagið Kjarnafasteign, sem er í eigu Karls Steingrímssonar, oft kenndur við Pelsinn. Eignin hefur verið á sölu frá árinu 2011 líkt og mbl greindi frá á sínum tíma. Í tilkynningu frá Stakfelli fasteignasölu, sem sá um söluna, kemur fram að kaupverðið sé trúnaðarmál. 

Kaupandi eru Höfðaeignir, sem er dótturfélag Festa. Á síðasta ári tók Festi yfir rekstur  Kaupáss, sem rekur m.a. matvöruverslanir undir merkjum Krónunnar. Festi hf. er í eigu SF V slhf. og eru hluthafar um 30 talsins. SÍA II er stærsti einstaki hluthafi félagsins með um 27% hlut. Lífeyrissjóðir eru með um 32% hlut, tryggingafélög og sjóðir 15% og einkafjárfestar um 26%.

Áður í gjaldþrota félagi

Austurvegur 1-5 var áður í eigu félagsins Vindasúla ehf., félags sem einnig var í eigu Karls. Félagið Vindasúlur ehf. var hins vegar úrskurðað gjaldþrota árið 2011 en á árinu 2009 var fasteignin færð yfir í Kjarnafasteign ehf.

Gjaldþrotaskiptum á Vindasúlum var lokið í desember sl. en kröfur í búið námu alls 1,3 milljörðum króna. Við skipt­in feng­ust um 657 millj­ón­ir króna greidd­ar upp í veðkröf­ur en um 297 millj­ón­ir upp í al­menn­ar kröf­ur, eða um 22,9 pró­sent.

Karl Steingrímsson ásamt eiginkonu sinni Ester Ólafsdóttur Eggert Jóhannesson

• Blogga um frétt