Kokkurinn Mathieu Zevenhuizen í Hreðavatnsskála setti líklega Íslandsmet á dögunum þegar hann bjó til lengstu íslensku núðluna sem menn muna eftir. Núðlan var hvorki meira né minna en 10,42 metrar að lengd.
Einungis sjö vikur eru síðan Mathieu flutti til landsins og hóf störf í Hreðavatnsskála en áður bjó hann í Sviss þar sem hann starfaði einnig sem kokkur. Annar eigandi skálans er Svisslendingur sem hafði séð atvinnuauglýsingu frá Mathieu á netinu og hafði samband.
Fyrir tveimur vikum var keypt ný pastavél og ákvað Mathieu í kjölfarið að láta reyna á afkastagetuna og sjá hversu langa pastaræmu hann gæti gert. Niðurstaðan var rúmir 10 metrar og fengu gestir og gangandi að deila afrakstrinum.
Mathieu segist hafa prófað sig mikið áfram með vélina og framleiðir nú ferskt og þurrkað pasta sem bæði er á matseðlinum í skálanum og selt í pokum Hreðavatnsskála
Þá stefnir hann einnig á að koma pastanu í almenna sölu þegar hann hefur tíma til þess að hefja framleiðslu af fullum krafti
Hreðavatnsskáli er við hringveginn í Norðurárdal en þar hefur veitingarekstur verið í 82 ár, eða allt frá árinu 1933 þegar Vigfús Guðmundsson hóf reksturinn. Núverandi eigendur, Daníel Kjartan Jónsson og Marion Thalman, tóku við skálanum árið 2013
Hér að neðan má sjá núðluna umræddu:
And the Result is....
Posted by 1933 Hreðavatnsskáli on Friday, July 24, 2015