Framleiddu þúsundir falsaðra iPhone-síma

Kínversk yfirvöld réðust til inngöngu í verksmiðju sem talin er hafa framleitt að minnsta kosti 41 þúsund falsaða iPhone-síma. Níu voru handteknir vegna málsins. 

Hundruð starfsmanna unnu í verksmiðjunni við að pakka inn gömlum farsímum og farsímahlutum sem síðan voru seldir sem „nýir iPhone-símar“.

Verksmiðjan hóf starfsemi í janúar í úthverfi Peking. Eigendurnir eru hjón.

Bandarísk yfirvöld létu þau kínversku vita af framleiðslunni eftir að hafa fundið falsaða iPhone síma á bandarískri grundu og gert þá upptæka. 

Lögreglan í Kína er nú í átaki gegn fölsuðum varningi sem framleiddur er í landinu. Hún er í samstarfi við bandaríska kollega sína og markmiðið er að stöðva flæði falsaðra vara milli landanna tveggja. 

Svipað mál kom upp árið 2011 í Kína. Þá var það bloggarinn BirdAbroad sem uppgötvaði sölu á fölsuðum símum. Starfsfólkið í verslununum hélt hins vegar að það væri að vinna fyrir Apple.

Frétt BBC.

• Blogga um frétt