Marel þaut af stað í Kauphöllinni í morgun en fyrirtækið birti í gær annað gott árshlutauppgjör. Kauphöllin opnar klukkan tíu en eftir fyrstu klukkustund opnunar nam velta með bréfin alls um 540 milljónum króna og viðskiptin voru 20 talsins.
Bréfin hafa hækkað um 1,5 prósent í verði í dag. Á einum mánuði hafa bréfin hækkað um 7,71 prósent en innan ársins er hækkunin 46,74 prósent.
Samkvæmt uppgjöri Marel jókst hagnaðurinn verulega milli ára og nam 19,5 milljónum evra á öðrum fjórðungi en hann var 0,8 milljónir króna á sama tímabili í fyrra.
Tekjur félagsins jukust jafnframt á tímabilinu og námu 218,3 milljónum evra, borið saman við 169,8 milljónir evra á sama tíma í fyrra.
Pantanabókin stóð í 165,9 milljónum evra í lok annars ársfjórðungs 2015 samanborið við 178 milljónir evra í lok fyrsta ársfjórðungs 2015.
„Við erum stolt af árangrinum sem byggir á sterku vöruframboði, nánum tengslum við viðskiptavini og góðum markaðsaðstæðum,“ var haft eftir Árna Oddi Þórðarsyni, forstjóra Marel, í afkomutilkynningu.
Fyrir birtingu uppgjörs Marel á fyrsta fjórðungi í apríl sendi félagið frá sér tilkynningu þar sem fram kom að afkoman yrði betri en upphaflega var gert ráð fyrir og í kjölfarið ruku bréf félagsins upp í Kauphöllinni. Þá kom í ljós að tekjurnar höfðu aldrei verið hærri á einum ársfjórðungi en þær námu alls 209,3 milljónum evra samanborið við 154,8 milljónir evra á sama tíma í fyrra.