Helsta hlutabréfavísitala Grikklands, Athex, lækkaði um 16,23% í dag en viðskipti hófust í kauphöllinni eftir fimm vikna lokun í dag.
Fjórir stærstu bankar landsins, Piraeus Bank, National Bank, Alpha Bank og Eurobank, lækkuðu mest, eða um 30%. Aldrei áður hafa hlutabréf lækkað jafn mikið í verði á einum degi í Grikklandi og í dag.
Árið 1987 lækkaði hlutabréfavísitalan þar um 15,03% á einum degi en það met var slegið í dag.
Kauphöllinni var lokað þann 26. júní sl. eða um svipað leyti og fjármagnshöftum var komið á í Grikklandi. Fara þarf aftur til ársins 1974 til þess að finna tímabil sem hún hefur verið lokuð jafn lengi.