Aðalfundur Síldarvinnslunnar fór fram í dag á Hótel Egilsbúð í Neskaupsstað. Á fundinum var ákveðið að fresta arðgreiðslum líkt og greint var frá á mbl.is áðan auk þess sem ekki verður gripið til uppsagna vegna innflutningsbannsins.
Í tilkynningu frá Síldarvinnslunni segir að í máli stjórnarformanns hafi komið fram að þótt ekki verði gripið til uppsagna vegna innflutningsbannsins geri starfsfólk fyrirtækisins sér grein fyrir því að vinnan gæti dregist saman, einkum vegna tapaðra loðnumarkaða.
Á fundinum kom fram að hagnaður ársins nám 6 milljörðum króna og opinber gjöld fyrirtækisins og starfsmanna þess námu 4,6 milljörðum króna.
Eiginfjárhlutfall fyrirtækisins er 55,7% og framleiddar afurðir félagsins voru um 85 þúsund tonn.
Rekstrartekjur samstæðunnar á árinu 2014 voru alls 21,4 milljarðar og rekstrargjöld 14,1 milljarður króna. EBITDA var 7,3 milljarðar króna og fjármagnsliðir voru jákvæðir um 820 milljónir króna.
Á árinu var fjárfest í aflaheimildum frá Stálskipum í Hafnarfirði og keypt voru hlutabréf í Gullbergi ehf á Seyðisfirði. Keypt var eitt nýtt uppsjávarskip, Börkur NK 122 sem smíðað var árið 2012 og ber 2.500 tonn.