Helstu hlutabréfavísitölur í Asíu hafa hækkað í morgun, til að mynda hefur Nikkei hlutabréfavísitalan hækkað um rúm 3% í Tókýó og í Sjanghaí nemur hækkunin 3,1% eftir 16% lækkun fyrr í vikunni.

Hækkunina má rekja til ákvörðunar kínverskra stjórnvalda að lækka stýrivexti í þeirri von að bæta stöðuna á fjármálamörkuðum.

Kínversk stjórnvöld lækkuðu stýrivexti úr 4,85% í 4,6% og einnig var bindiskylda bankanna lækkuð, sem merkir aukið fjármagn í hagkerfinu.

Þannig vilja ráðamenn í Peking reyna að sporna við því að hagvöxtur dvíni enn meira. Þetta í annað sinn á tveim mánuðum sem Kínverjar lækka bindiskyldu bankanna og gengið. Fyrr í sumar brugðust stjórnvöld við 30% lækkun á verðbréfum með því að styðja við hlutabréfakaup með sem svarar hundruðum milljarða dollara af ríkisfé.

Heimsmarkaðsverð á olíu hefur hækkað í dag en er enn nálægt því lægsta síðustu sex árin. Í New York hefur verð á West Texas Intermediate hráolíu til afhendingar í október hækkað um 28 sent og er 39,59 Bandaríkjadalir tunnan. Í Lundúnum hefur tunnan á Brent Norðursjávarolíu hækkað um 29 sent og er 43,50 Bandaríkjadalir.

Tengdar fréttir

Óróleiki á hlutabréfamörkuðum

Seðlabankinn rannsakar verklag söluráðgjafa

• Verðlækkun á mörkuðum
• Hiksti í Kína sendir óróleikabylgju
• Umtalsverð hækkun á mörkuðum
• Aukin bjartsýni meðal fjárfesta

» Fleiri tengdar fréttir

• Blogga um frétt