Á tímabilinu janúar til ágúst 2015 hafa ellefu tilkynningar um hópuppsagnir borist Vinnumálastofnun þar sem 295 manns hefur verið sagt upp störfum. Þetta er mikil fjölgun frá fyrra ári þar sem á öllu árinu 2014 bárust tíu tilkynningar um hópuppsagnir, þar sem sagt var upp 231 starfsmanni.
Í ágúst bárust Vinnumálastofnun tvær tilkynningar um hópuppsagnir þar sem 41 starfsmanni var sagt upp störfum í fiskvinnslu.
Líkt og fram hefur komið tók sjávarútvegsfyrirtækið Þórsberg ehf. á Tálknafirði í lok ágúst ákvörðun um að fresta því að hefja starfsemi eftir sumarleyfi. Öllum 26 starfsmönnum var af þeim sökum sagt upp störfum. Þá var öllum starfsmönnum fiskvinnslunnar Toppfisks á Bakkafirði einnig sagt upp störfum í mánuðinum.
Samkvæmt upplýsingum frá Vinnumálastofnun koma flestar uppsagnirnar til framkvæmda í desember 2015.
Skráð atvinnuleysi í júlí 2015 var 2,6 prósent, en að meðaltali voru 4.678 atvinnulausir í júlí og fækkaði atvinnulausum um 79 að meðaltali frá júní en hlutfallstala atvinnuleysis breyttist ekki.