Ríkir ala börnin öðruvísi upp

Þeir sem eiga mikið af peningum gera ýmsa hluti öðruvísi en aðrir. Þeir ala t.d. börnin sín upp á annan hátt samkvæmt nýrri rannsókn auðkýfingsins Steve Siebold sem byggir á viðtölum við 1.200 aðra auðkýfinga. Niðurstöður rannsóknarinnar birtust í bókinni „How Rich People Think“.

Þegar meðalmaðurinn kennir barninu sínu einungis að komast af, kenna þeir ríku börnunum sínum að verða rík.

Samkvæmt Siebold fer fræðsla um peninga oftast fram á sama hátt í gegnum margar kynslóðir. Sömu gildin erfast því frá einni fjölskyldu til annarrar.

Þeir sem hafa mikið á milli handanna segja börnum sínum að það sé í lagi að hafa löngun til þess að verða ríkur og að allir geti náð því markmiði. Meðalfjölskyldan segir barninu hins vegar oftast að setja öryggið á oddinn og sætta sig við þægindi. 

Í bloggfærslu á Huffington Post segir skýrsluhöfundur að í augum þeirra ríku sé lífið leikur sem eigi að spila af áræðni og óttaleysi. Það sé fordæmi sem þeir setja eigin börnum. Þeir kenna börnunum að líta á peninga sem jákvæðan hlut á meðan þeir sem minna eiga líta oft á peninga sem óvininn.

Í grein Business Insider er bent á að margir hafi gert athugasemd við rannsóknina sem virðist einungis snúast um stéttaskiptingu samfélagsins. 

• Blogga um frétt