Flugfélagið Emirates hefur fengið leikkonuna Jennifer Aniston til liðs við sig í nýrri auglýsingaherferð og samkvæmt tilkynningu frá félaginu virðast forsvarsmenn hafa fulla trú á afurðinni þar sem tuttugu milljónum Bandaríkjadala, eða sem jafngildir 2,5 milljörðum íslenskra króna, var varið í að tryggja auglýsingapláss víðs vegar um heim.
Í auglýsingunni lendir leikkonan í óskemmtilegri lífsreynslu þar sem áhöfnin í flugvél frá ónefndu félagi gerir óspart grín af henni þegar hún hyggst fara í sturtu eða kíkja á barinn. Fljótlega kemur þó í ljós að einungis hafi verið um vondan draum að ræða.
Í tilkynningu er haft eftir Boutros Boutros, framkvæmdastjóra hjá félaginu, að auglýsingin hafi verið skrifuð með Aniston í huga þar sem ætlunin var að sýna fram á lúxusinn hjá Emirates með gamansömum hætti.
Fyrir skömmu síðan hleypti einn helsti samkeppnisaðili Emirates, félagið Ethiad Airrways, auglýsingaherferð með leikkonunni Nicole Kidman af stokkunum. Hlutdeild félagana á Bandaríkjamarkaði hefur aukist að undanförnu við ófögnuð bandarískra samkeppnisaðila.
Hér má sjá auglýsinguna í heild sinni: