Hókus Pókus seldi gerviblóð, búninga og annan varning verslunarinnar fyrir rúmar 42 milljónir króna á síðasta ári. Eftirspurnin virðist nokkur jöfn milli ára þar sem sölutekjurnar voru nánast þær sömu árið 2013.
Í nýbirtum ársreikningi félagsins Hókus Pókus ehf., sem rekur samnefnda verslun á Laugavegi 69, kemur fram að hagnaður félagsins á síðasta ári hafi numið 3,5 milljónum króna. Hagnaðurinn dróst saman milli ára en hann nam 5,8 milljónum króna árið 2013 en í bókhaldinu kemur m.a. fram að húsnæðiskostnaður og launagjöld hafi aukist nokkuð milli ára.
Félagið er í níutíu prósent eigu Einars Arnarssonar en konan hans Hrafnhildur Eiðsdóttir á tíu prósenta hlut.
Í lok ársins námu eignir félagsins 59 milljónum króna en skuldirnar 82 milljónum króna og var eiginfjárstaða félagsins því neikvæð um tæpar 23 milljónir króna. Félagið keypti á síðasta ári fasteignina að Laugavegi 40 á 84 milljónir króna.