Lækka vörumerkisvirði Þýskalands

Greiningarfyrirtækið Brand Finance hefur lækkað virði Þýskalands í útreikningum sínum á virði þjóðríkja sem vörumerki í kjölfar útblásturshneykslis Volkswagen. Þýskaland trónir því ekki lengur á toppi lista fyrirtækisins yfir öflugustu þjóðvörumerkin, en Singapúr vermir nú toppsætið.

Haft er eftir forstjóra Brand Finance, David Haigh, að það sé sérstakt áhyggjuefni að fyrirtæki sem framleiðir jafn dæmigerðan þýskan bíll og VW skuli hafa hegðað sér með þessum hætti. Hneykslið ógni nú áratuga uppsafnaðri velvild sem Þýskaland hefur áunnið sér alþjóðlega og þetta hneyksli bætist við mútugreiðsluhneyksli Siemens sem hugsanlegt dæmi um almenna slæma viðskiptahætti í landinu.

Íran er hástökkvarinn á lista fyrirtækisins í ár en virði þess er talið hafa hækkað í virði um 59% og er þar þakkað störfum Hassans Rouhani, forseta landsins. Hófstilltir stjórnarhættir hans, stór innri markaður landsins, miklar jarðefnaeldsneytisauðlindir og menntun þjóðarinnar er sérstaklega talið íslamska lýðveldinu til tekna.

Sé tekið tillit til heildarstærðar þjóðanna og vörumerkja þeirra tróna þó Bandaríkin örugglega á toppnum með sinn gríðarstóra innri markað og þar á eftir Kína, Þýskaland, Bretland, Japan, Frakkland og Indland í sjöunda sæti.

Ísland er í nítugasta sæti í sama flokki hjá Brand Finance, metið á 11 milljarða dollara, einu sæti á eftir Sambíu og einu á undan Kýpur.

Hér má sjá skýrsluna í heild á vef Brand Finance.

The World’s 100 Most Valuable Nation Brands

• 1 blogg um fréttina

Bloggað um fréttina

• Ómar Ragnarsson: Víðtækara svindl en sýnist ?