Staða háskólamenntaðra batnar minnst

Útlit er fyrir að erfiðara hafi gengið að skapa störf fyrir háskólamenntaða á síðustu árum eða að fleiri störf þeirra hafi einfaldlega horfið. Þetta er staðan á sama tíma og almennt atvinnuleysi hefur verið á hraðri niðurleið. 

Meðalatvinnuleysi síðustu 12 mánuði hefur verið 3,2% samkvæmt tölum Vinnumálastofnunar um skráð atvinnuleysi og úrtakskönnun Hagstofunnar mælir 4,3% atvinnuleysi á sama tíma.

Í Hagsjá Hagfræðideildar Landsbankans kemur fram að frá janúar 2010 fram til ágúst 2015 hafi skráðum atvinnulausum fækkað um alls 71%. Atvinnulausum með grunnskólapróf hefur fækkað um 76%, atvinnulausum iðnaðarmönnum um 85%, en atvinnulausum með háskólamenntun hefur einungis fækkað um 45%.

Þá er staða kvenna verri en karla. Í ágúst 2015 voru háskólamenntaðar og ófaglærðar konur orðnar álíka margar í hópi atvinnulausra á höfuðborgarsvæðinu. Frá janúar 2010 hafði atvinnulausum konum á höfuðborgarsvæðinu fækkað um 55% en atvinnulausum konum með háskólamenntun einungis um 35%.

Sú þróun heldur því áfram að háskólamenntaðar konur verða sífellt stærra hlutfall atvinnulausra.

• 1 blogg um fréttina

Bloggað um fréttina

• Páll Vilhjálmsson: Enginn menntar sig til atvinnuleysis