Eik fasteignafélag hefur undirritað kauptilboð um kaup félagsins á útgefnu hlutafé Heimshótela ehf. Heimshótel á Hótel 1919 við Pósthússtræti 2 í miðbæ Reykjavíkur.
Fasteignir sem um ræðir og eru í eigu Heimshótela eru Pósthússtræti 2, Tryggvagata 28 og Hafnarstræti 9-11 í Reykjavík. Fasteignirnar eru tæpar 6 þúsund fermetrar að stærð og staðsettar í miðbænum.
Á Hótel 1919 eru 88 herbergi, auk þess sem veitingastaður og önnur þjónusta er rekin á jarðhæð. Leigusamningur við Hótel 1919 er til 10 ára og er Hótel 1919 með rekstrarsamning við alþjóðlegu hótelkeðjuna SAS Hotel A/S, dótturfélag Rezidor Hotel Group, um rekstur hótelsins undir nafni Radisson Blu.
Kaupverð í kauptilboði er trúnaðarmál og getur tekið breytingum eftir því hvert endanlegt kaupandlag verður í kaupsamningi. Kauptilboð var undirritað með ákveðnum fyrirvörum, meðal annars um niðurstöður áreiðanleikakönnunar.
Í tilkynningu segir að ef af kaupunum verður er áætlað að NOI, Net Operating Income eða Rekstrarhagnaður fyrir matsbreytingu og afskrifti, Eikar fasteignafélags hækki um 6-7% miðað við útgefna rekstrarspá fyrir árið 2015, auk þess sem eignasafn félagsins mun stækka um 5-6%.
Kaupin verða fjármögnuð með lántöku og handbæru fé félagsins.