Már Guðmundsson, seðlabankastjóri segir að það hafi sýnt sig að höftin sem sett voru hér á landi séu að virka. Hann segir að Seðlabankinn hafi ítrekað gripið inn á gjaldeyrismarkaði en það kosti að sjálfsögðu.
Hann segist vonast til þess að á yfirstandi þingi verði sett í lög að Seðalbankinn megi koma í veg fyrir að fyrirtæki, sveitarfélög og heimili taki lán í erlendri mynt sem ekki eru með tekjur í erlendri mynt.
Már segir að það sé spurning um hvort lítil ríki geti rekið eigin peningastefnu en það getur reynst þrautin þyngri.
Framundan er uppgjör slitabúa fallinna fjármálafyrirtækja í tengslum við losun fjármagnshafta. Í nýrri spá Seðlabankans er áætlað að uppgjörið eigi sér m.a. stað með greiðslu svokallaðs stöðugleikaframlags sem getur valdið verulegum breytingum á innlendum efnahagsreikningum meðan á uppgjörinu stendur.
Markmiðið er að beita markaðsaðgerðum Seðlabankans þannig að uppgjörið muni ekki hafa áhrif á lausafé í umferð eða peningamagn og þannig á aðhaldsstig peningastefnunnar miðað við það sem peningastefnunefnd bankans stefnir að.
Umbreytingarnar gætu hins vegar orðið það miklar að ekki takist fyllilega að vinna á móti þeim. Uppgjörið gæti því valdið tímabundnum breytingum á lausafé og aðhaldsstigi sem gæti aukið óvissu tímabundið, þótt hættan á því sé minni en ef uppgjörið færi fram í gegnum hinn valkostinn og búin myndu greiða stöðugleikaskatt.