WOW air hefur í dag sölu á flugi til Bristol en flug þangað hefst 13. maí á næsta ári. Flogið verður þrisvar sinnum í viku; á mánudögum, miðvikudögum og föstudögum, allan ársins hring. Bristol er annar áfangastaður WOW air í Bretlandi en flugfélagið hefur frá upphafi boðið upp á flug til London allan ársins hring.
Bristol er næststærsta borg Suður-Englands á eftir London en þar býr u.þ.b. hálf milljón íbúa. Borgin er mikil mennta- og menningarborg með mikla sögu sem nær allt til járnaldar. Fyrr á þessu ári hlaut Bristol nafnbótina „Græn borg“ (European Green Capital), fyrst breskra borga.
Í tilkynningu frá WOW er haft eftir Robert Sinclair, forstjóra Bristol flugvallar, að gaman verði að taka á móti Íslendingum til suðvesturhluta Bretlands auk þess sem hann bendir á að flugvöllurinn hafi verlið valin sá stundvísasti í byrjun ársins. „Farþegar WOW air mega búast við skilvirkri og vinalegri þjónustu þegar þeir heimsækja suðvesturhluta Bretlands,“ er haft eftir Sinclair.
Bristol flugvöllur þjónar suðvestur Bretlandi en meira meira 7 milljónir manna búa í innan við tveggja tíma akstursfjarlægð frá flugvellinum. Tæplega 6,7 milljónir farþega fóru um flugvöllinn árið 2015 og er hann því sá níundi stærsti á Bretlandi og fimmti stærsti flugvöllur í nágrenni London.
Nýlega var hafin vinna við uppbyggingu flugvallarins upp á 24 milljónir punda sem mun ljúka formlega árið 2016 en þá mun flugvöllurinn geta tekið á móti 10 milljón farþegum árlega.