Neytendastofa hefur tekið ákvörðun um að Hópkaup skuli greiða dagsektir, samtals 50.000 kr. á dag, þar til félagið breytir upplýsingum á vefsíðu sinni og skilmálum.
Fram kemur í ákvörðuninni, sem er frá 18. nóvember, að Hópkaup hafi 14 daga til að fara að ákvörðunni. Verði ekkert að gert, þykir Neytendastofu hæfilegt, að teknu tilliti til aðstæðna í máli þessu, meðalhófsreglu stjórnsýsluréttarins og jafnræðis við sektir í öðrum sambærilegum málum, að leggja á Hópkaup dagsektir að fjárhæð 50.000 kr. á dag þar til farið hefur verið að ákvörðun Neytendastofu
Fram kemur á vef Neytendastofu, að neytendur hafi lögbundinn rétt til að skila vöru sem keypt sé á netinu í 14 daga frá gerð samnings og fá endurgreiðslu kaupverðsins. Nánari upplýsingar um skilarétt má sjá hér.
Á vefsíðu Hópkaupa, undir liðnum „þjónustuloforð“ kemur fram að neytendur geti fengið inneign í formi netkróna komi til endurgreiðslu. Neytendastofa tók fyrr á árinu ákvörðun um að þjónustuloforð Hópkaup væri ekki í samræmi við ákvæði laga um húsgöngu- og fjarsölu. Þá komi ekkert fram í skilmálum hvernig endurgreiðslu sé háttað skili neytandi vöru innan 14 daga frá kaupum. Þar sem Hópkaup hafði ekki farið að ákvörðun Neytendastofu um að gera breytingar á upplýsingunum hefur nú verið tekin ákvörðun um dagsektir.
Dagsektarákvörðunina má lesa í heild sinni hér.
Uppfært 11:27
Haukur Skúlason, fjármástjóri Moberg Group, sem rekur m.a. Hópkaup, segir í yfirlýsingu að Hópkaup hafi þegar brugðist við ábendingum Neytendastofu og muni lagfæra það sem bent er á í úrskurðinum innan þess frests sem stofnunin hefur gefið fyrirtækinu áður en dagsektir verða lagðar á.