Nýja hótelið í Brautarholti 10-14 verður svokallað lífrænt „butique hotel“ og hefur fengið nafnið Eyja Guldsmeden. Hótelið verður rekið í samstarfi við dönsku hótelkeðjuna Guldsmeden hotels og mun starfa undir hennar nafni en keðjan á og rekur hótel víða um heim.
Framkvæmdir í Brautarholti hafa staðið nokkuð lengi yfir en um er að ræða 2.070 fermetra skrifstofuhúsnæði sem fékk þetta nýja hlutverk.
Í tilkynningu frá Eyju hóteli segir að sjálfbærni og vistvernd verði höfð að leiðarljósi í anda Guldsmeden hótelanna. Spornað verður gegn hvers kyns sóun og einblínt á að lágmarka matarsóun, endurnýta og endurvinna eins og kostur er. Mikið verður lagt uppúr persónulegri þjónustu og upplifun gesta.
Þá stenfur til að leggja mikinn metnað í fyrsta flokks veitingar og veitingaþjónustu. Unnið er með innlendum framleiðendum með lífrænar vottanir á sviði veitingareksturs og höfuðáhersla verður lögð á ferskt, lífrænt gæðahráefni beint frá býli og úr nærumhverfinu.
Eyja hótel er í eigu hjónanna Lindu Jóhannsdóttur og Ellerts Finnbogasonar, sem einnig eiga og reka Luna Hotel Apartments í Reykjavík. Mannverk sér um allar framkvæmdir á húsnæðinu.
Eignarhaldsfélagið Gautur seldi F fasteignafélagi eignina í byrjun þessa árs. F fasteignafélag er í eigu Hildu, eignarhaldsfélags Seðlabankans, en líkt og fram hefur komið hefur Seðlabankinn sett Hildu í sölu.