Milljarðamæringarnir Bill Gates, Mark Zuckerberg, Jeff Bezos og Richard Branson eru meðal nokkurra fjárfesta á bak við nýjan sjóð er kallast Breakthrough Energy Coalition og á að vinna að rannsóknum á endurnýjanlegum orkugjöfum.
Á bak við sjóðinn standa nokkur félög í opinberri- og einkaeigu, ríkissjóðir tuttugu landa, þ.á.m. Bandaríkjanna, Kína, Indlands og Brasilíu auk fjölmargra milljarðamæringa. Gates mun kynna sjóðinn nánar ásamt Barack Obama, Bandaríkjaforseta og Francois Hollande, Frakklandsforseta á loftlagsráðstefnunni í París.
Ríkisstjórnir fyrrnefndra landa hafa m.a. heitið því að tvöfalda fjármagnið sem þegar er lagt í loftlagsrannsóknir.
Í tilkynningu frá Gates segir að miklar framfarir hafi náðst í þróun á endurnýjanlegum orkugjöfum á borð við vind- og sólarorku en miðað við umfang vandans þurfi að leita í fleiri áttir og finna fleiri lausnir. Gates segir að einkafyrirtæki muni vinna að þróun tækninnar en hins vegar verði vinnan byggja á ríkisstyrktum rannsóknum.
Stærð sjóðsins hefur ekki verið fastmótuð en ljóst er að milljarðar munu renna í brýn verkefni tengd vandamálinu.
Sjóðurinn mun einblína á fimm atriði; raforku, samgöngur, iðnað, landbúnað og aukna skilvirkni orkukerfa.
Markmiðið er að takmarka hlýnun jarðar við tvær gráður.