Heilsíðuauglýsing frá þrjú hundruð stjórnendum íslenskra fyrirtækja var birt í fjölmiðlum í dag. Þar er skorað á Alþingi að lækka tryggingargjaldið. Meðal þeirra sem skrifa undir eru t.d. Ari Edwald, forstjóri MS, Þorsteinn Már Baldursson, forstjóri Samherja og Rannveig Rist, forstjóri Rio Tinto.
Í auglýsingunni segir að tryggingagjaldið komi harðast niður á litlum og meðalstórum fyrirtækjum þar sem flest ný störf verða til. „Fyrirtæki sem er með tíu starfsmenn í vinnu greiðir í raun laun þess ellefta en hann fær ekki að koma í vinnuna,“ segir þar. „Hátt tryggingagjald minnkar getu fyrirtækja til að hækka laun eða ráða fleiri í vinnu og takmarkar svigrúm fyrirtækja til að stunda rannsóknir, þróun og nýsköpun.“
Samtök atvinnulífsins hafa ítrekað bent á þetta en þau eru eitt þeirra sjö samtaka sem kostuðu birtingu áskorunarinnar ásamt Samtökum ferðaþjónustunnar, Samtökum fyrirætkja í sjávarútvegi, Samtökum fjármálafyrirtækja, Samtökum iðnaðarins og Samtökum verslunar og þjónustu.
Frétt mbl.is: Fjármagna horfið atvinnuleysi
Á staðgreiðsluárinu 2015 er tryggingagjaldshlutfallið samtals 7,49 prósent. Þar af er tryggingagjaldið sjálft 6,04 prósent, atvinnutryggingagjald 1,35 prósent, og síðan bætast við gjald í ábyrgðasjóð launa, þ.e. 0,05 prósent og markaðsgjald, sem er 0,05 prósent.
Atvinnuleysi hefur verið um þrjú prósent síðustu tólf mánuði.