Mestur afgangur af samgöngum

Þjónustujöfnuður við útlönd var jákvæður um 90,4 milljarða króna á þriðja ársfjórðungi og er það hækkun frá fyrra ári þegar hann var jákvæður um 77,8 milljarða króna. 

Samkvæmt bráðabirgðatölum var heildarútflutningur á þjónustu 189,9 milljarðar króna en innflutningur á þjónustu 99,5 milljarðar.

Hagstofan greinir frá þessu.

Ferðaþjónusta var stærsti þjónustuliðurinn í bæði inn- og útflutningi og var afgangur af henni 49,5 milljarðar. Útflutningur hennar nam 86,4 milljörðum og innflutningur 36,9 milljörðum. Afgangur vegna ferðaþjónustu var 36,6 milljarðar á sama ársfjórðungi árið 2014 á gengi hvors árs.

Mestur afgangur var hinsvegar af samgöngu- og flutningaþjónustu eða 55,5 milljarðar. Útflutningur þeirra nam 73,1 milljarði og innflutningur 17,6 milljörðum.

Önnur innflutt viðskiptaþjónusta nam 26,5 milljörðum og útflutningur 7,8 milljörðum á þriðja ársfjórðungi. Halli var því mestur af þeirri þjónustu eða 18,7 milljarðar.

• Blogga um frétt