Keilir á Ásbrú stefnir á að bjóða upp á þriggja ára stúdentsnám frá og með næsta hausti. Skólinn hefur fengið tilskilin leyfi frá menntamálaráðuneytinu og er nú vinna hafin við að koma skólanum á fót en hann mun bera nafnið Menntaskólinn á Ásbrú (MÁS).
Hjördís Alda Hreiðarsdóttir og Þorsteinn Surmeli, íslenskukennarar við Háskólabrú Keilis, munu hafa umsjón með námsbrautinni. Áhersla verður lögð á nýjustu aðferðir í námi og kennslu og undirbúa nemendur fyrir störf framtíðarinnar að því er segir í tilkynningu.
MÁS verður að mörgu leyti frábrugðinn öðrum framhaldsskólum. Skólinn mun leggja áherslu á vendinám (e. flipped classroom) sem hefur verið stór hluti af starfi Keilis á undanförnum árum.
Í skólanum verða hvorki hefðbundnar kennslustofur né hefðbundin stundatafla heldur munu nemendur stunda sína vinnu í skólanum þar sem kennarar verða til staðar og leiðbeina þeim.
„Skóladagurinn í MÁS mun ekki hefjast fyrr en klukkan 9 á morgnana enda eru áhrif myrkurs á sálarlíf Íslendinga vel þekkt,“ segir í tilkynningu. „Dagleg hreyfing verður hluti af skólastarfinu enda mun MÁS leggja áherslu á bæði andlega og líkamlega vellíðan nemenda og starfsfólks.“
Á Keili er meðal annars hægt að læra einkaþjálfun, leiðsögunám í ævintýramennsku á háskólastigi, tæknifræði á háskólastigi, einka- og atvinnuflugmannsnám og flugvirkjun. Þá hafa um 1.400 manns lokið háskólabrú sem er aðfararnám að háskólanámi.