Seðlabanki Svíþjóðar lækkaði stýrivexti sína í dag um 0,15 prósentur og verða þeir því neikvæðir eða -0,5%.
Í yfirlýsingu peningastefnunefndar kemur fram að efnahagslífið haldi áfram að styrkjast en allt bendi til þess að verðbólga verði minni í ár en fyrri spár hljóðuðu um. Það bendi allt til þess að verðbólga verði áfram undir 2% verðbólgumarkmiðum bankans en vonir standi til þess að með aðgerðum bankans verði hægt að ná henni upp í verðbólgumarkmiðin á næsta ári.
Bankinn er reiðubúinn til þess að ganga lengra en nú er til þess að tryggja að verðbólgumarkmið hans náist en gert er ráð fyrir að vextir bankans verði neikvæðir í ár og á næsta ári.
Spá Seðlabanka Svíþjóðar hljóðar upp á 3,5% hagvöxt í ár en á næsta ári verði hann 2,8% og 2,5% árið 2018. Bankinn spáir því að atvinnuleysi minnki í ár og verði 6,8% að meðaltali og 6,7% á næsta ári.