500 milljóna lán verði tryggt með útsvari

Félagsbústaðir hafa óskað eftir því að 500 milljóna króna lántaka félagsins hjá Lánasjóði sveitarfélaga verði tryggð með veði í útsvarstekjum Reykjavíkurborgar.

Beiðnin var tekin fyrir á fundi borgarráðs í gær og var samþykkt að vísa erindinu til borgarstjórnar. Lánið er til fjörtíu ára og með verðtryggðum 3,2 prósent vöxtum. 

Lánið er tekið til að fjármagna kaup á félagslegu húsnæði og til uppgreiðslu óhagstæðari lána Félagsbústaða sem tekin voru til kaupa og viðhalds á félagslegu húsnæði. 

Ef borgarstjórn fellst á ábyrgðina skuldbindur hún sig jafnframt til þess að selja ekki eignarhlut sinn í Félagsbústöðum til einkaaðila áður en lánið verður greitt að fullu.

Fari svo að borgin selji eignarhlut í Félagsbústöðum til annarra opinberra aðila skuldbindur hún sig þá til að tryggja að samhliða yfirtaki nýr eigandi ábyrgð á láninu í hlutfall við eignarhlut sinn.

• 1 blogg um fréttina

Bloggað um fréttina

• Guðmundur Ásgeirsson: Óhagstæðari en 3,2% verðtryggt?