Viðskipti | mbl | 25.4.2016 | 15:24 | Uppfært 26.4.2016 11:00

Ólafur og Dorrit ekki kröfuhafar

Forsetahjónin Ólafur Ragnar Grímsson og Dorrit Moussaieff mbl.is/Eggert Jóhannesson

Hvorki Ólafur Ragnar Grímsson né Dorrit Moussaieff hafa átt kröfur í slitabú föllnu bankanna. Eignir Dorritar eru í Bretlandi og eignir Ólafs eru á Íslandi.

Þetta segir í svari Árni Sigurjónssonar, skrifstofustjóra á skrifstofu forseta Íslands, við fyrirspurn mbl.

Ný frétt: Fjölskylda Dorritar átti aflandsfélag

Mbl sendi fyrispurn til forseta með nokkrum spurningum sem Kári Stefánsson bar upp í aðsendri grein í Morgunblaðinu í dag. Þar spurði hann hverjar eignir forsetahjónanna væru og hvar þær væru geymdar. Þá spurði hann hvort þau ættu kröfur á föllnu bankanna og hvers vegna opinber gjöld af erlendum eignum hjónanna væru ekki greidd á Íslandi.

Frétt mbl.is: Ólafur geri grein fyrir eignum

Í stuttu svari segir að Dorrit sé breskur ríkisborgari með lögheimili í Bretlandi. Þar hafi hún og fjölskylda hennar búið og stundað atvinnu í áratugi. Hún greiði því skatta í Bretlandi.

Ættu að eiga saman lögheimili

Í grein sem Unnur Bachmann, lögfræðingur á skatta- og lögfræðisviði PwC, skrifaði á viðskiptasíðu mbl í fyrra, segir að hjón skuli samkvæmt lögheimilislögum eiga sama lögheimili.

Í framkvæmd sé þó að myndast hefð fyrir því að vikið sé frá þeirri kröfu þegar annað hjóna starfar erlendis. Hjónum sem búa og starfa sitt í hvoru landinu hafi fjölgað mjög á síðustu árum.

Í þjóðskrá eru Ólafur og Dorrit skráð sem „hjón ekki í samvistum“.

Dorrit flutti lögheimilið til Bretlands árið 2012. „Þegar horfur voru á að eiginmaður minn yrði ekki lengur forseti gerði ég ráðstafanir til að geta sinnt meira fyrri störfum mínum í London, einkum í ljósi þess að foreldrar mínir, sem stjórnað hafa fjölskyldufyrirtækinu, eru nú háaldraðir,“ sagði í yfirlýsingu frá Dorrit árið 2013 þegar fjölmiðlar spurðust fyrir um flutningana.

Skýra í samræmi við tekjuskattslög

Sagði hún að ákvæði lögheimilislaga bæri að skýra í samræmi við ákvæði tekjuskattslaga er fjallar um heimilisfesti hjóna.

Í 63. gr. tekjuskattslaga segir að svo geti verið ástatt hjá hjónum að annar makinn sé skattskyldur ótakmarkað vegna heimilisfesti hér á landi, þ.e. með lögheimili, en hinn makinn með takmarkaða skattskyldu, þ.e. ekki með lögheimili hér á landi vegna ákvæða samninga Íslands við önnur ríki eða af öðrum ástæðum.