Fyrrverandi framkvæmdastjóri Sameinaða lífeyrissjóðsins sem hætti störfum í kjölfar umfjöllunar um Panamaskjölin fær greiddan sex mánaða uppsagnarfrest. Fyrrverandi framkvæmdastjóri Stapa fær ekki greiddan uppsagnarfrest. Hvorugur þeirra á rétt á starfslokagreiðslum.
Kári Arnór Kárason, fyrrverandi framkvæmdastjóri Stapa, hætti störfum hinn 23. apríl sl., áður en umfjöllun Kastljóss um þátt lífeyrissjóðanna í Panamaskjölunum var sýndur.
Frétt mbl.is: Hættir hjá Stapa vegna Panamaskjala
Kristján Örn Sigurðsson, fyrrverandi framkvæmdastjóri Sameinaða lífeyrissjóðsins, lét af störfum á miðvikudaginn í síðustu viku.
Frétt mbl.is: Kristján lætur af störfum
Lífeyrissjóðurinn Stapi auglýsti eftir nýjum framkvæmdastjóra á laugardaginn og í samtali við mbl segist Þórarinn Sverrisson, stjórnarformaður sjóðsins, ekki vita hvort margir hafi sýnt starfinu áhuga en Capacent sér um ráðninguna. Umsóknarfrestur rennur út þann 15. maí nk.
Segir hann þó að einn hafi verið búinn að sýna starfinu áhuga áður en það var auglýst.
Aðspurður hvort Kári eigi rétt á starfslokagreiðslu eða fái greiddan uppsagnarfrest í kjölfar starfslokanna svarar Þórarinn neitandi. Hann segir Kára hafa hætt störfum samstundis og að hann eigi ekki rétt á frekari launagreiðslum.
Kári Arnór hafði stýrt lífeyrissjóði í 23 ár. Fyrst stýrði hann Lífeyrissjóði Norðlendinga, sem sameinaðist svo Lífeyrissjóði Austurlands 2007, undir merkjum Stapa - lífeyrissjóðs.
Ólafur Haukur Jónsson, skrifstofustjóri hjá Sameinaða lífeyrissjóðnum, hefur starfað sem tímabundinn framkvæmdastjóri eftir að Kristján lét af störfum.
Starf framkvæmdastjóra hefur ekki verið auglýst en Ólafur segir að það verði gert á næstu dögum.
Aðspurður um launa- og starfslokagreiðslur segir Ólafur að Kristján eigi ekki rétt á starfslokagreiðslu. Hann á hins vegar rétt á sex mánaða greiddum uppsagnarfresti samkvæmt ráðningarsamningi.
Ólafur vill þó ekki tjá sig frekar um málið að svo stöddu og bendir á að tilkynning frá sjóðnum um þessi efni verði birt á heimasíðu Sameinaða lífeyrissjóðsins í vikunni.
Kristján Örn stýrði Sameinaða lífeyrissjóðnum í ellefu ár, eða frá árinu 2005.
Í umfjöllun um Panamaskjölin kom fram að Kristján Örn, framkvæmdastjóri Sameinaða lífeyrissjóðsins, var skráður fyrir tveimur aflandsfélögum. Annað var Mika Asset, sem var skráð í Panama 2007 í gegnum Landsbankann í Lúxemborg. Hitt var Fulcas Inc. sem stofnað var í Panama 2009 í gegnum Nordea-bankann.
Kári var skráður fyrir tveimur aflandsfélögum, annars vegar Hola Holding, sem Kaupþing stofnaði í Lúxemborg árið 1999, og hins vegar Utvortis Ltd., sem MP banki stofnaði á Bresku Jómfrúareyjunum árið 2004. Í Kastljósi í gær kom fram að Hola Holding fékk tuga milljóna króna lán frá Kaupþingi og Utvortis velti tugum milljóna króna á þriggja ára starfstíma sínum.
Hvorugur þeirra hafði getið félaganna í hagsmunaskráningu.
Líkt og mbl greindi frá fyrr í dag hefur Fjármálaeftirlitið sent fjármálafyrirtækjum, lífeyrissjóðum og vátryggingafélögum dreifibréf þar sem hvatt er til að þessir aðilar yfirfari hagsmunaskráningu stjórnenda og starfsmanna sinna með hliðsjón af lögum sem nánar eru tiltekin í dreifibréfunum.
Í bréfi FME segir að lífeyrissjóðir þurfi að gæta að orðspori sínu.
„Fjármálaeftirlitið telur mikilvægt að lífeyrissjóðir gæti að orðsporsáhættu sinni sem einingar tengdar almannahagsmunum. Sjóðfélagar eigi að geta treyst því að hagsmunaskráning stjórnenda og starfsmanna sé í samræmi við lög og reglur sem þar um gilda. Komi í ljós við yfirferð að annmarkar hafi verið á hagsmunaskráningu lífeyrissjóðs óskar Fjármálaeftirlitið eftir því að vera upplýst um slíkt án tafar.“
Frétt mbl.is: Eiga að yfirfara hagsmunaskráningu
http://www.mbl.is/vidskipti/frettir/2016/05/02/eiga_ad_yfirfara_hagsmunaskraningu/