Næsta útibú Dunkin' Donuts á Íslandi verður á Fitjum í Reykjanesbæ og er áætlað að opnað verði í júní. Þetta er fjórða opnun kleinuhringjakeðjunnar á einu ári. Tólf staðir á næstu fjórum árum eru hins vegar enn þá eftir.
Í heildina verða þeir sextán talsins.
Staðirnir þrír sem opnaðir hafa verið hingað til eru allir á höfuðborgarsvæðinu; fyrsti á Laugavegi, annar í Kringlunni og sá þriðji við Smáralind. Þetta er því fyrsti staðurinn utan höfuðborgarsvæðisins.
Mikill spenningur virðist alltaf ríkja við opnun á nýjum stöðum þar sem ársbirgðir af kleinuhringjum fylgja fyrir fyrstu gesti. Þrátt fyrir að aðsóknin á þessar opnanir sé alltaf mikil hefur aðeins dregið úr. Um þrjátíu manns biðu til að mynda við opnun á nýjasta stað keðjunnar við Smáralind en þegar fyrsti staðurinn var opnaður á Laugavegi stóðu yfir hundrað manns í röð.