Vilja bílhræin burt

Fulltrúar Sjálfstæðisflokksins, Halldór Halldórsson og Hildur Sverrisdóttir, hafa lagt til að umhverfis- og skipulagsráð hvetji til breytingar á lögreglusamþykkt svo „íbúar Reykjavíkur þurfi ekki að búa við að nágrannar þeirra noti garða sína sem nokkurs konar kirkjugarða fyrir úr sér gengin bílhræ öllu umhverfinu til ama“.

Þetta kemur fram í síðustu fundargerð ráðsins.

Benda borgarfulltrúarnir á að lögreglusamþykktin sé ekki í samræmi við reglugerð um lögreglusamþykkt en í henni segir:

„Heimilt er að undangenginni viðvörun, t.d. með álímingarmiða með aðvörunarorðum, að flytja burtu og taka í vörslu sveitarfélags ökutæki sem standa án skráningarnúmera á lóðum við almannafæri, götum og almennum bifreiðastæðum.“

„Sama gildir um ökutæki sem skilin eru eftir á opnum svæðum. Tilkynna skal skráðum eiganda og/eða umráðamanni um flutninginn og skal hann bera kostnað vegna flutnings og vörslu ökutækisins.“

Málinu var frestað og hefur það ekki hlotið samþykki.

• Blogga um frétt