Í nýafstöðnu útboði Strætó bs. á nýjum strætisvögnum sem opnað var miðvikudaginn 6. júlí kom í ljós að rafmangsvagnar sem Yutong Eurobus ehf bauð upp á voru hagkvæmasti kosturinn og ódýrari kostur heldur en hefðbundnir dísilvagnar.
Yutong Eurobus ehf. er umboðsaðili Yutong í Skandinavíu.
Yutong er stærsti framleiðandi rútu og strætisvagna í heiminum í dag og hefur einnig verið leiðandi í framleiðslu á rafmangsvögnum. Félagið hefur framleitt þúsundir slíkra vagna sem verið hafa í akstri í yfir áratug í Kína og ramfangsvagnar frá Yutong eru einnig í verkefnum í París Frakklandi og í Póllandi.
Í tilkynningu er haft eftir Úlfari Björnssyni, stjórnarformanni Yutong Eurobus ehf., að það væri einkar ánægjulegt ef Ísland yrði einnig leiðandi land í að taka upp umhverfisvænar samgöngur. „Við bíðum spenntir eftir niðurstöðum frá Strætó bs. þar sem verið er að meta tilboðið og aðra þætti sem því tengjast,“ er haft eftir Úlfari.
Í útboðinu bárust tilboð frá Hópbifreiðum Kynnisferða, BL ehf., Yutong Eurobus ehf., og Aflvélum ehf.