Viðskipti | mbl | 14.7.2016 | 13:24 | Uppfært 18:31

Framhaldsskólakennarar hækka mest

Laun framhaldsskólakennara hafa hækkað mest frá árinu 2006 samkvæmt nýrri skýrslu. mbl.is/Eggert

Á síðustu tíu árum hafa laun á almennum markaði hækkað um tæp áttatíu prósentustig og er þróunin nærri hnífjöfn hjá ríkinu og sveitafélögum. Á sama tíma hefur launamunur kynjanna minnkað töluvert.

Út er komin skýrslan „Í kjölfar kjarasamninga“ sem fjallar um launaþróun eftir samningssviðum og viðsemjendum á tímabilinu 2006 til 2015. Samkvæmt opinberum upplýsingum Hagstofunnar hækkuðu laun á almennum markaði um 79,6 prósentustig frá fjórða ársfjórðungi 2006 til fjórða ársfjórðungs 2015. Á sama tímabili hækkuðu laun um 78,3 prósentustig hjá ríkinu og um 78,6 prósentustig hjá sveitarfélögunum. Með öðrum orðum var launaþróunin hnífjöfn milli þessara þriggja megi samningssviða á vinnumarkaði og var hækkunin að jafnaði 6,7 prósentustig á ári.

Launamunur hefur minnkað

Samkvæmt skýrslunni hefur launamunur kynjanna minnkað töluvert á tímabilinu sem er í takti við rannsókn „Aðgerðahóps stjórnvalda og samtaka aðila vinnumarkaðarins“ sem kom út á síðasta ári. Niðurstaða skýrslunnar er að í öllum heildarsamtökum og samningssviðum hafa laun kvenna hækkað meira en karla á tímabilinu 2006 til 2015.

Salek-hópurinn skrifar undir. Niðurstöður skýrslunnar eru ekki hluti af reglubundinni upplýsingagjöf Hagstofunnar heldur byggja á sérvinnslu úr gagnasafni stofnunarinnar samkvæmt beiðni Salek. mbl.is/Styrmir Kári

Framhaldsskólakennarar hækka mest

Laun framhaldsskólakennara hækkuðu langmest allra starfsstétta bæði árin 2014 og 2015, eða um 15,9 prósentustig fyrra árið og 18,1 prósentustig hið síðara. Laun þeirra hækkuðu um 100 prósentustig frá nóvember 2006 samanborið við 78 prósentustiga hækkun á almennum vinnumarkaði. Rekja má skýringar á hækkun launa framhaldsskólakennara umfram aðra hópa til breytts vinnumat í kjarasamningi þeirra og tímabundinnar tengingar við launaþróun BHM-félaga.

Í hópunum sem fjallað er um voru regluleg laun, án yfirvinnu, félagsmanna BHM hæst að meðaltali, eða 552 þúsund krónur á mánuði, þar á eftir framhaldsskólakennara, 542 þúsund krónur, en meðaltal reglulegra launa á almennum vinnumarkaði var 428 þúsund krónur.

Stjórnendur hækkuðu minnst

Í skýrslunni er launaþróun einnig skipt eftir starfsstéttum og atvinnugreinum. Þar kemur fram að verkafólk hækkaði umtalsvert umfram aðrar starfsstéttir í öllum atvinnugreinum á almennum vinnumarkaði á tímabilinu 2006 til 2015.

Í iðnaði hækkaði verkafólk um 93 prósentustig samanborið við 60 prósentustiga hækkun stjórnenda sem hækkuðu minnst. Í verslun hækkaði verkafólk um 89 prósentustig og afgreiðslufólk um 81 prósentustig samanborið við 62 prósentustiga hækkun stjórnenda og í samgöngum og flutningum hækkaði verkafólk einnig um 89 prósentustig samanborið við 66 prósentustiga hækkun stjórnenda.

Stjórnendur hækkuðu einnig minna en aðrar starfsstéttir hjá ríki og sveitarfélögum.

Kaupmáttur aukist mest hjá framhaldsskólakennurum

Kaupmáttur launa í heild var 11 prósentustigum meiri árið 2015 en árið 2006 samkvæmt launavísitölu Hagstofunnar.

Kaupmátturinn var 24 prósentustigum hærri hjá framhaldsskólakennurum, sextán prósenstustigum hærri hjá félagsmönnum ASÍ sem starfa hjá ríkinu, fimmtán prósentustigum hærri hjá grunnskólakennurum, tólf prósentustigum hærri hjá félagsmönnum BHM hjá ríkinu, tíu prósentustigum hærri hjá félagsmönnum ASÍ á almennum markaði og níu prósentustigum hærri hjá félagsmönnum BSRB sem starfa hjá ríkinu.

Hér má lesa skýrsluna í heild.