Hátt settur bankamaður handtekinn

Hátt settur framkvæmdastjóri hjá breska bankanum HSBC var í dag handtekinn í New York vegna gruns um að hafa tekið þátt í að hagræða vöxtum á alþjóðlegum gjaldeyrismörkuðum.

Maðurinn, Mark Johnson, er framkvæmdastjóri gjaldeyrisviðskipta hjá bankanum og starfar í Lundúnum. Hann var handtekinn á John F. Kennedy-flugvellinum í New York í dag, að sögn breska ríkisútvarpsins.

HSBC var einn sex banka sem bresk og bandarísk stjórnvöld sektuðu í nóvember 2014 vegna þeirrar háttsemi verðbréfasala bankanna að leggja saman á ráðin og hagræða vöxtum í gjaldeyrisviðskiptum, til tjóns fyrir aðra markaðsaðila.

Búist er við því að Johnson verði leiddur fyrir dómara í Brooklyn síðar í dag, að því er fram kemur í frétt Bloomberg, sem greindi fyrst frá málinu.

Forsvarsmenn HSBC greindu frá því í ágúst í fyrra að þeir hefðu sett til hliðar 1,3 milljarða Bandaríkjadala til þess að mæta mögulegum sektargreiðslum vegna hneykslisins.

• Blogga um frétt