Spænska hagkerfið gæti vaxið um 2,9 prósentustig á þessu ári, að sögn Luis de Guindos, starfandi efnahagsráðherra landsins. Opinberar spár gera ráð fyrir 2,7% hagvexti í ár.
Hann segir þó að útlitið fyrir næsta ár sé ekki eins bjart, enda sé þá spáð lægri hagvexti í heimshagkerfinu.
de Guindos er staddur á fundi fjármálaráðherra G-20 ríkjanna sem fer nú fram í kínversku borginni Chengdu.
Hann benti á að hægagangur væri á evrusvæðinu sem gæti haft áhrif á hagvaxtartölur á Spáni. Spænsk stjórnvöld spá 2,4% hagvexti í landinu á næsta ári.
Ekki hefur tekist að mynda nýja og starfhæfa ríkisstjórn í landinu þrátt fyrir að tvennar þingkosningar hafi farið fram undanfarna mánuði.
Lýðflokkur Mariano Rajoy, forsætisráðherra Spánar, fór með sigur af hólmi í þingkosningunum í júní. Niðurstaðan hróflaði þó lítið við þráteflinu sem hefur verið uppi frá því að kosið var í desember.
Hvorki gekk né rak að mynda nýja ríkisstjórn á Spáni eftir þingkosningar sem fóru fram í lok síðasta árs. Því þurfti að boða til nýrra kosninga og hlaut íhaldssami flokkur Rajoy flest þingsæti líkt og áður, án þess þó að ná hreinum meirihluta. Flokkurinn bætti við sig fimmtán þingmönnum frá því í desember. Sósíalistar hlutu næstflest þingsæti en töpuðu lítillega líkt og hinir flokkarnir.