Hagnaður írska lággjaldaflugfélagsins Ryanair jókst lítillega á fyrsta ársfjórðungi rekstrarársins en varað er við því að útganga Bretlands úr Evrópusambandinu (Brexit) geti haft neikvæð áhrif á rekstur félagsins.
Hagnaður fyrir skatta jókst um 4% á tímabilinu apríl til loka júní miðað við sama tímabil í fyrra. Nam hagnaðurinn 256 milljónum evra, sem svarar til 34,5 milljarða króna. Í fréttatilkynningu frá Ryanair kemur fram að tekjur félagsins hafi numið 1,68 milljörðum evra sem er 2% aukning frá sama tímabili í fyrra.
Fram kemur í tilkynningu að óstöðugleiki á markaði, meðal annars vegna ítrekaðra verkfalla flugumferðarstjóra og aukinnar hættu af hryðjuverkum, hafi haft áhrif á reksturinn. Jafnframt hafi veiking breska pundsins eftir Brexit-atkvæðagreiðsluna haft áhrif.
Þjóðaratkvæðagreiðsla Breta nýverið þar sem samþykkt var að yfirgefa Evrópusambandið kom stjórnendum Ryanair á óvart og olli jafnframt vonbrigðum. Þeir eigi von á að þetta þýði tímabil þar sem bæði pólitískur sem og fjárhagslegur óstöðugleiki muni ráða ríkjum bæði í Bretlandi og ESB. Þessi óstöðugleiki muni valda skaða hvort sem horft er til hagvaxtar eða væntinga neytenda, segir enn fremur í tilkynningu frá Ryanair.
Vegna Brexit ætlar Ryanair að færa áherslur í rekstrinum frá breskum flugvöllum á aðra flugvelli í Evrópu á næstu tveimur árum. Strax í vetur verður dregið úr flugferðum um Stansted-flugvöll í Lundúnum, það er flugferðum verður fækkað en ekki verður hætt við neina áætlunarstaði.
Áætlanir Ryanair fyrir rekstrarárið í heild, 1. apríl 2016–31. mars 2017, gera ráð fyrir 12% aukningu hagnaðar og hann nemi 1,375–1,425 milljörðum evra. Varað er við því að ekki sé ljóst hvort áætlanir standist vegna Brexit.