Gengi hlutabréfa Icelandair Group hefur lækkað um 7,9% í kauphöll það sem af er degi. Gengið er nú 27,95 og hefur ekki verið lægra síðan í ágúst á síðasta ári.
Jafngildir það því að markaðsvirði félagsins hafi lækkað um 10,8 milljarða í viðskiptum dagsins. Markaðsvirði þess er nú tæpir 140 milljarðar króna.
Félagið tilkynnti í gær að það hefði lækkað afkomuspá sína fyrir árið, einkum fyrir áhrif ytri þátta. Þetta er í annað sinn á þessu ári sem afkomuspá félagsins er lækkuð.
Spáir félagið því að EBITDA ársins 2016 verði 220 milljónir dala eða 25,4-26,6 milljarðar króna. Í upphafi ársins hljóðaði spáin upp á 245-250 milljónir dala.