Gistinóttum fjölgar um fjórðung

Heildarfjöldi gistinátta á hótelum í júní var 357.400 en það er 25% aukning frá í júní 2015 samkvæmt upplýsingum frá Hagstofu Íslands. Gistinætur erlendra gesta voru 93% af heildarfjölda gistinátta í mánuðinum en þeim fjölgaði um 27% frá sama tíma í fyrra. Gistinóttum Íslendinga fjölgaði um 3% á sama tímabili.

„Flestar gistinætur á hótelum í júní voru á höfuðborgarsvæðinu eða 206.400 sem er 29% aukning miðað við júní 2015. Um 58% allra gistinátta voru á höfuðborgarsvæðinu. Næstflestar voru gistinætur á Suðurlandi eða um 53.300. Erlendir gestir með flestar gistinætur í júní voru: Bandaríkjamenn með 90.700, Þjóðverjar með 62.100 og Bretar með 36.800 gistinætur,“ segir á vefsíðu Hagstofunnar.

Ennfremur segir að á tólf mánaða tímabili frá júlí 2015 til júní 2016 hafi gistinætur á hótelum verið 3.222.300 sem sé 28% aukning miðað við sama tímabil árið áður. Nýting herbergja hafi verið best á höfuðborgarsvæðinu í júní eða um 87,4%. Vakin er á því athygli að eingöngu sé miðað við gistinætur á hótelum sem opin eru allt árið. Til þess flokks gististaða teljist hvorki gistiheimili né hótel sem eingöngu eru opin yfir sumartímann.

• Blogga um frétt