Segir vísitölu neysluverðs lækka með tilkomu Costco

„Áhrif opnunar Costco á verðlag hérlendis geta orðið nokkuð víðtæk,“ segir dr. Már Wolfgang Mixa, aðjunkt í fjármálum við Háskólann í Reykjavík.

Í fréttaskýringu um þetta mál í Morgunblaðinu í dag segir Már ljóst að ákveðnar vörur komi til með að lækka mikið, en aðrar minna.

„Þegar hið mikla afl þeirra til innkaupa á hagstæðara verði en öðrum er kleift að ná er skoðað, þá blasa áhrifin við. Tími einkaumboðanna er liðinn og hver sem er getur flutt inn hvaða vöru sem honum sýnist. Það blasir því við að Costco mun nota það gríðarlega afl sem fyrirtækið hefur til innkaupa á vörum á hagstæðu verði.“

Fram kom í umfjöllun ViðskiptaMoggans í gær að velta Costco er 35-föld velta smásöluverslunarinnar í landinu.