Ríkisstjórn Panama kynnti í gær lagafrumvarp sem beinist gegn ríkjum sem hafa sett Panama á lista yfir skattaskjól í kjölfar upplýsinga sem birtar voru í byrjun apríl, Panama-skjalanna.
Samkvæmt lagafrumvarpinu verða skattar og önnur gjöld lögð á fyrirtæki og einstaklinga frá þessum ríkjum. Með því að setja Panama á slíka svarta lista yfir skattaskjól séu ríkin að beita sér gegn Panama og hafa neikvæð áhrif á efnahag landsins.
Þetta gæti meðal annars haft bein áhrif á frönsk fyrirtæki og einstaklinga því Frakkland setti Panama á lista sinn yfir skattaskjól eftir að upplýst var í Panama-skjölunum um aflandsfélög í eigu margra auðugustu einstaklinga og fyrirtækja heims. Aflandsfélögin urðu til á skrifstofu lögmannsstofunnar Mossack Fonseca í Panama. Eins gæti þetta haft áhrif í Kólumbíu sem hefur lagt sérstaka tolla á vefnaðarvöru sem flutt er inn frá Panama þrátt fyrir andmæli frá Alþjóðaviðskiptastofnuninni, WTO.
Stjórnvöld í Panama hafa heitið því að leggja aukinn kraft í baráttuna við peningaþvætti og skattaundanskot en það hefur ekki gengið sem skyldi.