Þýskir launþegar munu ekki komast á eftirlaun fyrr en þeir eru orðnir 69 ára, verði tillaga Bundesbank, þýska seðlabankans, samþykkt. Í tillögunni segir að þýsk stjórnvöld ættu að hugleiða að hækka eftirlaunaaldurinn úr 65 árum upp í 69 ár fyrir árið 2060. Annars muni þýska ríkið mögulega eiga í erfiðleikum með að mæta lífeyrisskuldbindingum sínum.
Í yfirlýsingu bankans segir að þýska lífeyriskerfið stand vel eins og er, en að kröfum á lífeyriskerfið muni fara fjölgandi á næstu áratugum. Þegar sú kynslóð sem fæddist á árunum eftir heimstyrjöldina síðari fari á eftirlaun þá taki færri yngri starfsmenn við störfum þeirra
Núverandi stefna þýskra stjórnvalda gerir ráð fyrir að eftirlaunaaldur hækki í skrefum til ársins 2030 upp í 67 ára aldur. Seðlabankinn telur hins vegar ekki nóg að gert ætli stjórnvöld að halda eftirlaunasjóðnum í 43% af meðaltekjum.
Bankinn leggur þess vegna til að eftirlaunaaldurinn verði hækkaður upp í 69 ár. „Frekari breytingar eru nauðsynlegar til að tryggja fjárahagslegt sjálfstæði (eftirlaunasjóðs ríkisins) segir í mánaðarskýrslu seðlabankans.
Steffen Seibert, talsmaður þýsku stjórnarinnar, segir stjórnvöld hins vegar ekki hafa hug á að hækka eftirlaunaaldurinn frekar. „Það er skynsamleg og nauðsynlegar ráðstöfun að hækka eftirlaunaaldur upp í 67 ár í ljósi þjóðfélagsbreytinga í Þýskalandi. Þess vegna munum við gera þær breytingar sem við höfum samþykkt skref fyrir skref,“ hefur fréttavefur BBC eftir Seibert.