Dómari í San Francisco í Bandaríkjunum hefur fellt úr gildi samkomulag sem leigubílaforritið Uber náði nýverið við 385 þúsund bílstjóra sem keyra fyrir fyrirtækið. 

Bílstjórarnir kröfðust þess að yfirmenn Uber litu á þá sem starfsmenn Uber, en ekki verktaka. Það þýðir að fyrirtækið þurfi að greiða þeim meðal annars lífeyri og tryggingar. Hótuðu þeir að höfða mál á hendur Uber, en að lokum komust þeir að samkomulagi við fyrirtækið sem kvað meðal annars á um að Uber greiddi þeim hundrað milljónir dala í sáttagreiðslu.

Dómari í San Francisco hefur hins vegar komist að þeirri niðurstöðu að samkomulagið hafi ekki verið „sanngjarnt, nægjanlegt eða skynsamlegt“.

Í tilkynningu sögðu yfirmenn Uber að niðurstaðan væri vonbrigði.

„Samkomulagið, sem báðir deiluaðilar samþykktu sameiginlega, var sanngjarnt og skynsamlegt. Ákvörðunin veldur okkur vonbrigðum og erum við að kanna möguleika okkar,“ sagði í tilkynningunni frá Uber.

Uber hafði samþykkt, samkvæmt samkomulaginu, að greiða bílstjórum í Kaliforníu og Massachusetts 84 milljónir dala til að byrja með.

Samkvæmt samkomulaginu fengju bílstjórarnir jafnframt 16 milljónir dala til viðbótar ef Uber tæki ákvörðun um að skrá sig á hlutabréfamarkað og ef markaðsvirði fyrirtækisins ykist um 150% frá því sem það var í desember 2015.

En áfram yrði þó litið á bílstjórana sem verktaka, ekki starfsmenn Uber.

Lögfræðingur bílstjóranna sagði á sínum tíma að um væri að ræða „sögulegt“ samkomulag.

Frétt BBC

Tengdar fréttir

Uber

Uber vill bera kennsl á ölvaða

• Uber leyndi stuldi á gögnum viðskiptavina
• Reglur í endurskoðun og horft til Uber
• Mega banna starfsemi Uber
• Stjórnarformaður Uber segir upp

» Fleiri tengdar fréttir

• Blogga um frétt