Þorsteinn Sæmundsson, þingmaður Framsóknarflokksins, gagnrýndi vaxtastefnu Seðlabanka Íslands á fundi efnahags- og viðskiptanefndar Alþingis með peningastefnunefnd bankans í morgun og sagði stýrivextina allt of háa.

Hann sagði bankann jafnframt ekki hafa svarað nægilega vel þeirri gagnrýni sem hefði komið á vaxtastefnuna frá hinum ýmsu sérfræðingum, þar á meðal Jóni Daníelssyni, prófessor í hagfræði og fjármálum við London School of Economics. Bankinn hefði eingöngu sagt að hann væri ósammála gagnrýninni. 

Már Guðmundsson seðlabankastjóri svaraði því þannig að bankinn hefði ekki endilega svarað mönnum með því að nefna þá á nafn en hefði þó útskýrt mál sitt vel  á opinberum vettvangi.

„Við fögnum allri málefnalegri umræðu um þessi mál, ekki síst ef hún er fræðilega undirbyggð,“ svaraði Már.

Hann tók fram að margir sérfræðinganna hefðu fullyrt ýmsa hluti án þess að hafa lagt fram rannsóknir sem hefðu stutt við skoðun þeirra.

Einnig sagði hann að þótt margir þessara aðila væru sérfræðingar á sínum sviðum væru þeir ekki sérfræðingar þegar kæmi að peningastefnu.

Frétt mbl.is: Útlitið er ekki alveg svart

Tengdar fréttir

Vextir á Íslandi

Telur forsendur fyrir vaxtalækkun

• Arion banki hækkar vexti
• „Á réttri leið en nokkuð í land ennþá“
• „Skýr skilaboð til Seðlabankans“
• „Okkur miðar í rétta átt“

» Fleiri tengdar fréttir

• Blogga um frétt