Svissneska fyrirtækið Nestlé hefur lækkað árlega vaxtarspá sína og spáir því nú að vöxturinn verði 3,5%. Í ágúst hafði því verið spáð að vöxturinn yrði 4,2%.
Nestlé er einn stærsti súkkulaði- og kaffiframleiðandi heims, eigandi vörumerkja eins og Nespresso og KitKat. Í tilkynningu frá fyrirtækinu segir að hægt sé að tengja breytta vaxtarspá við breytt umhverfi á markaðinum sem hefur valdið því að verð á mat hefur lækkað.
Sölutekjur fyrirtækisins fyrstu níu mánuði ársins námu 65,51 milljarði svissneskra franka, andvirði um 7.500 milljarða íslenskra króna. Það er hækkun milli ára en á sama tíma í fyrra voru sölutekjurnar 64,86 milljarðar svissneskra franka.