Bandaríska fjarskiptafyrirtækið AT&T inc. hefur náð samkomulagi um kaup á fjölmiðla-og afþreyingarfyrirtækinu Time Warner inc. og nemur tilboðið um 105-110 dölum á hlut samkvæmt fréttavef Wall Street Journal.
Yfirtakan verður tilkynnt von bráðar og jafnvel í kvöld að mati heimildarmanna WSJ. Stjórnir beggja fyrirtækja hittust í dag til að ganga frá kaupunum sem skiptast í reiðufé og hlutabréf til helminga og eru yfir 80 milljarða dala virði.
Með kaupunum ryður AT&T sér leið í afþreyingarbransann en þau þykja einnig mikill sigur fyrir Jeff Bewkes, forstjóra Time Warner, sem aflaði sér óvinsælda meðal fjárfesta fyrir tveimur árum þegar hann hafnaði yfirtökutilboði frá 21st Century Fox sem hljóðaði upp á 85 dali á hlut.