Heildartekjur Tryggingamiðstöðvarinnar á þriðja ársfjórðungi ársins námu 4,37 milljörðum króna og var það aukning um 8% milli ára. Hagnaður tímabilsins minnkaði hinsvegar um 43%, fór úr 1,4 milljarði króna í 809 milljónir.
„Afkoma félagsins á þriðja ársfjórðungi var góð og nokkru betri en áætlanir höfðu gert ráð fyrir. Munurinn liggur að mestu í betri afkomu af vátryggingastarfsemi. Vátryggingastarfsemin skilar mjög góðri afkomu annan fjórðunginn í röð en samsett hlutfall á þriðja ársfjórðungi var 86%. Uppsafnað samsett hlutfall ársins er því komið í 93% sem er talsvert betri árangur en við þorðum að vona í upphafi árs. Það er ljóst að þær aðgerðir sem félagið réðst í á þessu og síðasta ári eru að skila verulegum afkomubata. Fjárfestingatekjur fjórðungsins voru í takt við áætlanir og skila 2,1% ávöxtun. Uppsafnaðar fjárfestingatekjur ársins nema nú rúmum 2.000 m.kr. sem jafngildir 10,8% ársávöxtun,“ er haft eftir Sigurði Viðarssyni, forstjóra TM í tilkynningu.
Fjármunatekjur námu 546 milljónum króna sem jafngildir 2,1% ávöxtum fjáreigna. „Góð afkoma var af hlutabréfum, fasteignum og ríkisskuldabréfum. Á móti kemur að önnur verðbréf lækkuðu töluvert og styrking krónunnar hafði þau áhrif að gjaldeyrismunur var neikvæður um 137 milljónir króna,“ segir í tilkynningu.
Þar segir jafnframt að áætlaður hagnaður ársins sé rúmir þrír milljarðar króna.