Seldu meira bensín en í fyrra

Rekstrarhagnaður N1 fyrir afskriftir (EBITDA) nam 1,47 milljarði króna á þriðja ársfjórðungi ársins miðað við 1,1 milljarð á sama tímabili 2015.

Framlegð af vörusölu jókst um 13,2 % á ársfjórðungnum en í afkomutilkynningu félagsins er það tengt við að umferð á þjóðvegum landsins hafi aukist um 9,1% á þriðja ársfjórðungi ársins samanborið við sama tíma í fyrra.

Selt magn af bensíni og gasolíu jókst um 8,9% á milli ára. Eigið fé var 8,54 milljarðar króna og eiginfjárhlutfall 39,6% í lok þriðja ársfjórðungs.

Aukin umsvif á einstaklingsmarkaði

Í afkomutilkynningu segir að aukning í framlegð félagsins skýrist að mestu af auknum umsvifum á einstaklingsmarkaði og bílaþjónustu. Óhagstæð þróun var á heimsmarkaðsverði olíu á þriðja ársfjórðungi 2015 sem hafði neikvæð áhrif á framlegð en heimsmarkaðsverð á bensíni lækkaði um 31%  og díselolía lækkaði um 19% á sama tímabili. Á þriðja ársfjórðungi 2016 var óveruleg hækkun á bensíni og díselolíu á heimsmarkaði. Samningsbundnar launahækkanir skýra að mestu hærri launa- og starfsmannakostnað á þriðja ársfjórðungi 2016 miðað við sama tímabil 2015 ásamt fjölgun stöðugilda vegna aukinna umsvifa á einstaklingsmarkaði.

Umsvif í eldsneytissölu á einstaklingsmarkaði jukust á milli tímabila sem tengist að mestu aukinni umferð samfara auknum fjölda ferðamanna á milli ára. Velta annarra vara jókst um 8,7% á ársfjórðungnum ef horft er til sama tímabils á árinu 2015 en aukningin skýrist einnig af auknum umsvifum á einstaklingsmarkaði og í bílaþjónustu. Framlegð annarra vara jókst um 9,6% en aukning í framlegð skýrist af breyttri sölusamsetningu þriðja ársfjórðungi 2016 miðað við sama tímabil í fyrra.

Órói á olíumörkuðum

Samningsbundnar launahækkanir skýra að mestu hærri launa- og starfsmannakostnað á þriðja ársfjórðungi 2016 miðað við sama tímabil 2015 ásamt fjölgun stöðugilda. Meðalfjöldi starfsmanna umreiknaður í heilsársstörf á tímabilinu var 597 en var 582 á sama tíma í fyrra en fjölgun stöðugilda er vegna aukinna umsvifa á einstaklingsmarkaði.

Í afkomutilkynningunni kemur fram að órói á olíumörkuðum muni valda sveiflum á framlegð og fjárbindingu en áfram er gert ráð fyrir áframhaldandi fjölgun erlendra ferðamanna á milli fjórða ársfjórðungi 2015 og 2016.

Innlendar kostnaðarhækkanir munu hafa áhrif á reksturinn þrátt fyrir lága verðbólgu Í ljósi afkomu á fyrstu 9 mánuðum ársins gerir félagið nú ráð fyrir að EBITDA ársins 2016 verði 3.500 – 3.600 milljónir króna. Sú spá byggir á því að olíuverð verði tiltölulega stöðugt og að gengi USD/ISK verði í kringum 115.

Markaðsvirði félagsins í lok september nam 26,5 milljörðum króna og hluthafar voru 1.168.

• Blogga um frétt