Lego opnar í Kína

Danski leikfangaframleiðandinn Lego hefur sett verksmiðju á laggirnar í Kína og er þetta fyrsta verksmiðja fyrirtækisins í Asíu.

Fyrir ári neitaði Lego að selja kínverska andófslistamanninum Ai Weiwei kubba fyrir verk sem hann var með í vinnslu.

Um fimmtu kubbaverksmiðjuna er að ræða og er hún í Zhejiang-héraði. Þar verða framleiddar um 80% af þeim vörum sem Lego selur í Asíu.

Lego hætti í upphafi árs að óska eftir upplýsingum um hvað kubbar fyrirtækisins verða notaðir í þegar þeir eru keyptir í miklu magni í heildsölu.

Lego fékk á sig harða gagnrýni í fyrra þegar Ai Weiwei skýrði frá því að fyrirtækið hefði neitað að afgreiða kubbapöntun hans þar sem hann hefði verið talinn ætla að nota kubbana í pólitískum tilgangi. Ai kvaðst hafa orðið orðlaus af undrun og á samfélagsmiðlum tengdu menn synjunina við nýlega tilkynningu um að samningar hefðu náðst við kínversk yfirvöld um byggingu Legolands í Sjanghaí.

Ai er þekktasti listamaður Kína og hefur oft gagnrýnt kínversk stjórnvöld. Hann notaði Lego-kubba til þess að búa til myndir af pólitískum aðgerðasinnum víðs vegar um heim á sýningu árið 2014 um tjáningarfrelsið, en hún var haldin á fangaeyjunni Alcatraz í San Francisco-flóa. Aðdáendur listamannsins söfnuðu Lego-kubbum fyrir hann eftir að fyrirtækið neitaði að selja honum kubba.

• 1 blogg um fréttina

Bloggað um fréttina

• Ásgrímur Hartmannsson: Þarna hafa þeir samkeppni