„Ég tel að með þessu sé verið að stíga skref til að hjálpa bankanum að ná sér á strik aftur,“ segir Lárus L. Blöndal, stjórnarformaður Bankasýslunnar, spurður hvort hann telji Steinþór Pálsson, bankastjóra Landsbankans, axla ábyrgð á Borgunarmálinu með því að láta af störfum.
Bankaráð Landsbankans og Steinþór komust að samkomulagi fyrr í dag um að hann láti af störfum hjá bankanum.
Lárus L. segist virða þessa ákvörðun hans sem sé tekin af báðum aðilum.
Steinþór hefur verið bankastjóri frá 1. júní 2010 en Hreiðar Bjarnason, framkvæmdastjóri fjármála og staðgengill bankastjóra, hefur tekið við stjórn bankans. Staða bankastjóra verður auglýst svo fljótt sem verða má.
Frétt mbl.is: Steinþór hættur hjá Landsbankanum